ເງື່ອນໄຂການຈັດການຮຽນ-ການສອນອາຊີວະສຶກສາແບບຄວບຄູ່
ນອກຈາກການຮຽນ-ການສອນ ທີ່ກວມລວມທັງສອງສະຖານທີ່ແລ້ວ ການດຳເນີນການຂອງ ອາຊີວະສຶກສາແບບຄວບຄູ່ ຍັງຮຽກຮ້ອງສິ່ງເຫຼົ່ານີ້:
- ບົດບັນທຶກຊ່ວຍຈໍາ ລະຫວ່າງສະຖານອາຊີວະສຶກສາ ແລະ ສະຖານປະກອບການ;
- ມາດຕະຖານອາຊີບ, ຫຼັກສູດ ແລະ ສື່ການຮຽນ-ການສອນເຊິ່ງພັດທະນາຮ່ວມກັນກັບຜູ້ຕາງໜ້າພາກທຸລະກິດ,
- ການຝຶກອົບຮົມໃຫ້ແກ່ຄູສອນ, ຄູຝຶກແລະ ຜູ້ປະສານງານ ຂອງ ສະຖານອາຊີວະສຶກສາ ແລະ ສະຖານປະກອບການ;
- ການຄັດເລືອກນັກຮຽນອາຊີວະສຶກສາ ຮ່ວມກັນ;
- ເຊັນສັນຍາການຝຶກປະຕິບັດລະຫວ່າງນັກຮຽນອາຊີວະສຶກສາ ແລະ ສະຖານປະກອບການ;
- ຮ່ວມກັນຈັດຝຶກອົບຮົມ, ສອບເສັງ ແລະ ທົດສອບ, ໃຫ້ການຢັ້ງຢືນ ແລະ ອອກປະກາສະນີຍະບັດ.
ແຜນງານ ການຮຽນ-ການສອນອາຊີວະສຶກສາແບບຄວບຄູ່ ໄລຍະເວລາຢ່າງ ໜ້ອຍ 2 ປີແລະໃນລະດັບ C3 ຫຼືສູງກວ່າ.
ກົດໝາຍວ່າດ້ວຍອາຊີວະສຶກສາ ໄດ້ກໍານົດໃນມາດຕາ 12 ຄື:
“ການຮຽນແບບຄວບຄູ່ ແມ່ນການຮຽນຢູ່ໃນສະຖານທີ່ຮຽນ ສອງບ່ອນຄື: ຢູ່ໃນໂຮງຮຽນໃຫ້ຮຽນພາກທິດສະດີ ແລະ ຝຶກແອບການປະຕິບັດຂັ້ນພື້ນຖານ; ຢູ່ໃນຫົວໜ່ວຍແຮງງານໃຫ້ຝຶກແອບການປະຕິບັດຕົວຈິງເປັນຫຼັກ.”
ສິ່ງດັ່ງກ່າວແມ່ນໄດ້ລະບຸຕື່ມໃນຂໍ້ຕົກລົງ ກົດໝາຍວ່າດ້ວຍອາຊີວະສຶກສາ ຂອງລັດຖະມົນຕີ ລົງວັນທີ 23.12.2013, ຄໍາສັ່ງລັດຖະມົນຕີວ່າດ້ວຍ ອສຄ ເລກທີ່ 8819 ລົງວັນທີ 08.12.2016 ແລະ ຂອບແນວຄວາມຄິດ ແລະ ການຈັດຕັ້ງປະຕິບັດ ອາຊີວະສຶກສາແບບຄວບຄູ່.